Наша арганізацыя на правах паўнапраўнага чальца ўступіла ў партнёрства з Беларускім Домам правоў чалавека ў Вільні, стаўшы такім чынам часткаю вялікай праваабарончай сеткі. "Спадзяемся, што працуючы поруч з такімі моцнымі праваабарончымі структурамі, як "Вясна", Хельсінкскі камітэт, БАЖ, а таксама з дзесяткамі партнёраў ва ўсім свеце, мы зможам больш зрабіць для паляпшэння сітуацыі ў Беларусі," - кажа старшыня JuBIC Мар'яна Ільіна.
3 сакавіка 2010 г. на агульным сходзе саўладальнікаў Беларускага Дома правоў чалавека ў Вільні было прынятае адзінагалоснае рашэнне аб прыняцці JuBIC у склад чальцоў асацыяцыі. Гэта азначае, што наша арганізацыя, працягваючы дзейнасць у Літве, будзе аказваць дапамогу ў працы наймацнейшых беларускіх праваабаронцаў па ўзмацненні традыцыяў павагі да правоў чалавека ў пост-савецкай Беларусі, абароне асобаў, пацярпелых ад сістэмы, і ўдасканаленні прававога асяроддзя.
Інтарэсы JuBIC у ДПЧ будзе прадстаўляць старшыня арганізацыі Мар'яна Ільіна.
"JuBIC - не праваабарончая арганізацыя, аднак узмацненне правоў чалавека - гэта ключ да дасягнення асноўных мэтаў нашай НГА: шчыльнейшых сувязяў Беларусі з Літвой і ЕЗ, агульнай дэмакратызацыі краіны, - гаворыць М. Ільіна. - Мы таксама імкнемся падкрэсліць важнасць забеспячэння ў Беларусі і Літве каштоўнасцяў правоў і свабодаў асобы. У дзейнасці арганізацыі мы акцэнтуем права на свабоду руху, якая шмат для каго з беларусаў цяпер абмежаваная па прычыне візавай заслоны паміж краінай і дзяржавамі ЕЗ. Гэтае становішча павінна змяняцца".
JuBIC ужо пэўны час супрацоўнічае з віленскім ДПЧ, а таксама з Фундацыяй ДПЧ ў Осле - прыглядае за інтэрнет-старонкай установы, ладзіць мерапрыемствы. "Цяпер разам з праваабаронцамі Нарвегіі і Беларусі будзем дбаць пра гэты Дом, як пра свой. Будзем дамагацца, каб ён для беларусаў стаў сапраўдным астраўком свабоды і грамадзянскага дыялогу ў традыцыйна талерантнай Вільні", - сцвярджаюць наноў спечаныя партнёры ДПЧ.
